Ceir pump dosbarth Ysgol Sul yn Salem, dosbarth y plant meithrin, dosbarth y plant bach, dosbarth y plant oed canol, dosbarth y plant oed Uwchradd a dosbarth yr oedolion. Daw y plant i gyd i'r capel ar gyfer rhan agoriadol yr Oedfa (gweler chwith). Wedi canu'r emyn cyntaf a gwrando ar ddarlleniad, ceir gair gan bregethwr y dydd i'r plant. Yn y llun ar y chwith isod gwelir y Parchedig Athro Dr. Elwyn Richards yn annerch y plant  - roedd y bechgyn bach wrth eu boddau gan mai arfau'r saer oedd ganddo dan sylw. Yna, fe aiff un o ddisgyblion yr Ysgol Sul ymlaen i ledio'r emyn. Yn ystod yr emyn  mae'r plant yn ymadael â'r Oedfa ac yn mynd i'r Festri ar gyfer eu gwers.
Mae'r lluniau ar y dudalen hon yn dangos rhai o'r plant sy'n mynychu'r Ysgol Sul (gydag ymddiheuriadau i'r plant hynny nad ydynt yn y lluniau - anodd yw cael Sul pan fo pawb yno).Oherwydd nad oedd digon o le yn yr hen ystafell ddosbarth i'r nifer cynyddol o blant bach sy'n mynychu'r Ysgol Sul erbyn hyn ac er mwyn gallu cydymffurfio'n llawn â gofynion deddfwriaeth Diogelwch Plant `rydym bellach wedi gorffen addasu rhan o'r festri ar gyfer Ysgol y plant lleiaf.

Gosodwyd carped clyd ar y llawr a phrynwyd dodrefn ac offer addas i greu amgylchfyd deniadol a dymunol ar eu cyfer.
Mae'r athrawesau a'r mamau gweithgar wedi mabwysiadu dulliau bywiog y Cynllun Sachau Stori i gyflwyno gwersi i'r plant bach ac mae'n braf gweld y festri ar ei newydd wedd a'r plant wrth eu bodd gyda'u dosbarth newydd.
Yn y llun ar y dde gwelir Mrs Rhianwen Edwards, Arolygwraig yr Ysgol Sul, yn adrodd stori  "Moses yn yr Hesg" i'r plant.
Ar y dde isod gwelir rhai o aelodau dosbarth Mrs Llinos Cadwaladr, sef y plant 8 i 11 oed yn ymarfer canu ar gyfer gwasanaeth arbennig, dan arweiniad ein gweinidog, y Parchedig Megan Williams. Seilir eu gwersi hwy ar y llyfryn "Gôl", sef yr ail lyfr yn y gyfres ar gyfer dosbarthiadau Ysgolion Sul. Mae'r plant hynaf a'r bobl ifanc yn astudio'r  trydydd llyfr yn y gyfres, sef "Stilio", dan arweiniaid eu hathrawes, Mrs Bethan Williams.
Mawr yw ein dyled i athrawesau ymroddgar yr Ysgol Sul am eu llafur di-flino.